kuchh is ada se hamein gham-gusar milte hain
hazar zakhm pas-e-e'tibar milte hain

shab-e-firaq ki wahshat na puchhiye hum se
hum apne hijr se diwana-war milte hain

ye shahr-e-zakhm-faroshan hai hae kya kije
ki pa-e-gul bhi yahan khar khar milte hain

wo jin ki kokh mein shauq-e-khirad panapta hai
wo walwale bhi junun ka shikar milte hain

saja ke rakhte hain jin ko chamak ki khwahish mein
wo aaine bhi hamein dagh-dar milte hain

hamein unhi se tawaqqo hai 'naz' manzil ki
jo raste hamein ban kar ghubar milte hain