kya yahi us ka mudawa na hua
ek bimar jo achchha na hua

chaar tinke hi sahi jal to gae
kya mere dam se ujala na hua

un ki qurbat hi sahi hasil-e-zist
ye to andaz-e-tamanna na hua

hai tamanna-e-tulu-e-khurshid
aur agar phir bhi sawera na hua

pursish-e-gham to hui thi lekin
hum se izhaar-e-tamanna na hua

lazzat-e-dard-e-mohabbat ke sabab
hum ko marna bhi gawara na hua

gham ne wo bazm sajai 'ehsas'
main zara der ko tanha na hua