main shama-e-bazm-e-alam-e-imkan kiya gaya
insaniyat ko dekh ke insan kiya gaya

ab mere imtihan ka saman kiya gaya
yani supurd-e-alam-e-imkan kiya gaya

mahfuz main ne rakkhe junun ke tabarrukat
daman agar phata to gareban kiya gaya

tai kar ke irtiqa ke manazil ko shauq se
pahuncha jab apne had pe to insan kiya gaya

sach puchhiye to kya tha faqat ek khar-zar
mere liye jahan ko gulistan kiya gaya

dariya to aur bhi the zamane mein be-shumar
aab-e-hayat chashma-e-haiwan kiya gaya

kuchh aur raushni ka badha husn ya nahin
fanus mein jo shoale ko pinhan kiya gaya