mili hai rahat hamein safar se
thakan to le kar chale the ghar se

abhi palak par palak na baithi
ye khwab aane lage kidhar se

falak pe kuchh der chand thahra
widaa lete hue sahar se

tawil nowel mein zindagi ke
tamam qisse hain mukhtasar se

wo dekhte dekhte hi ek din
utar gaya tha meri nazar se

usi gali mein nahin gae bas
guzar gae hum idhar udhar se

guzar-basar ki hai koi surat?
ye sirf hogi guzar-basar se

dhuen se 'atish' jalengi aankhen
jale nahin hum is ek dar se