miyan sabr-azmai ho chuki bas
milo ab bewafai ho chuki bas

bahaar-e-khud-numai ho chuki bas
jahan chhuti hawai ho chuki bas

yahi hai us ki gar begana-wazai
to hum se aashnai ho chuki bas

bharosa kya hamara ashk ki bund
jahan mizhgan par aai ho chuki bas

phanse sayyaad ke phande mein be-tarah
hamari ab rihai ho chuki bas

na mil hajjam-e-rukhsar us ke har-dam
mundaya khat safai ho chuki bas

ada mein wan ada niklin hain lakhon
main samjha be-adai ho chuki bas

dila mat dida-e-khun-bar ko ponchh
har ek ungli hinai ho chuki bas

yahi darban pe hai qadghan to yaro
saba ki wan rasai ho chuki bas

ghazal ai 'mushafi' ye 'mir' ki hai
tumhaari mirzai ho chuki bas