mujhe mili hai agar infiradiyat ki sanad
bacha ke laya hun apni salahiyat ki sanad

bhula diye hain alif-lailwi sabhi qisse
ghazal ne jab se mujhe di jadidiyat ki sanad

pareshan-haal hai har shakhs is zamane mein
mili hai kis ko yahan khair-o-afiyat ki sanad

tha apne shahr mein muddat se ajnabi ki tarah
janab mujh ko mili aaj shahriyat ki sanad

tum ek ahl-e-sukhan ho adab ke tare ho
tum apne ahd se lo apni ahmiyat ki sanad

khuda ka shukr hai a 'ram' is zamane mein
main zinda hun hai yahi meri khairiyat ki sanad