mujhe tujh se bichhad jaane ka dukh hai
kali ke khil ke murjhane ka dukh hai

mujhe kal tu ne thahraya tha lekin
jahan ko aaj thukrane ka dukh hai

wafa pane ki dil mein aarzu thi
tamasha ban ke rah jaane ka dukh hai

tujhe sau bar samjhaya tha main ne
magar ab tere kumhlane ka dukh hai

jagata hai mujhe shab bhar tera gham
khushi apni na begane ka dukh hai

laga kuchh jhadte patte dekh kar yun
mere tanha chale aane ka dukh hai

agarche aaj 'hasrat' chup hai lekin
teri tanqid ka tane ka dukh hai