na khak-e-khushk ke thahre na shakh-e-tar ke rahe
hum apne ghar se uthe kya ki dar-ba-dar ke rahe

hamari fikr bhi ek daere mein qaid rahi
charagh bhi jo hue hum to ek bhanwar ke rahe

wo log the jo kahani ke markazi kirdar
wo harf-harf jiye khwab khwab mar ke rahe

shikastagi thi muqaddar badan the shishe ke
zara si thes bahana hui bikhar ke rahe

lahu ki lahr uthi thi ki sar se guzregi
chadhe the kitne samandar magar utar ke rahe

hawa ke sath hi ho len ye tajraba bhi sahi
simat simat ke rahe jis qadar bikhar ke rahe

chalo kahin piyen baithen ghazal sunaen sunen
ye masale to mere dost umr-bhar ke rahe