nahin rahega hamesha ghubar mere liye
khilenge phul sar-e-rahguzar mere liye

kabhi to hogi kisi ko meri kami mahsus
kabhi to hoga koi sogwar mere liye

taras gae the mere lab hansi ko jis ke sabab
hua hai aaj wahi ashk-bar mere liye

wo mere qurb se mahrum hi rahe shayad
wo muntazir hai samundar ke par mere liye

meri talash mein hoga mera nasib kabhi
wo waqt laega parwardigar mere liye