nashat-e-sahra-nawardi ka haal bolta hai
hamara shauq hamin ko nidhaal bolta hai

uruj-e-dilbari hasrat se dekhne wale
wo sun jo silsila-e-paemal bolta hai

ye kya sitam hai ki ab us ka samna hoga
jo lab hilae bina bhi kamal bolta hai

bhanwar ko ek kinara samajh raha hun main
kisi ke hone ka kya ehtimal bolta hai

zamane bhar ko main dil se nikal deta hun
zamana jab tujhe dil se nikal bolta hai

haqiqi aankhon se dekha gaya hai ye manzar
mere sukut se tera khayal bolta hai

abhi na dekhenge hum aane wale kal ki taraf
abhi to guzre zamanon ka haal bolta hai