nayan mein khun bhar aaya dil mein khar-e-gham chhupa shayad
hua is dam wo tegh-abru kisi se aashna shayad

gale lagta tha har gard-e-hawa-awurd se majnun
ki khak-e-kucha-e-laila le aai ho saba shayad

qayamat pa-namak hai ghul diwanon ka gulistan mein
unhon ke zakhm-e-dil par shor-e-bulbul ja gira shayad

hamare hath ek mu gai nain aur pech khati hai
wo dam-e-zulf mein taza shikar-e-dil phansa shayad

bahut munh par wo zulfen aaj bikhraata hai ai 'uzlat'
wo galon par kisi ka zakhm-e-dandan hai laga shayad