nazar mein jab se teri chashm-e-kaif-amez hai saqi
mujhe jam-e-sharab-e-nab se parhez hai saqi

nigah-e-shauq ki hairaniyan badhti hi jati hain
hazaron rang mein ye kaun jalwa-rez hai saqi

idhar to jalwa-gar dil mein idhar poshida aankhon se
ye nazdiki mein duri bhi tahayyur-khez hai saqi

ye kya sujhi tujhe duniya-e-nau ki tarah-andazi
jahan ka zarra zarra inqalab-angez hai saqi

shahidan-e-mohabbat zinda-e-jawed hote hain
wo amrit hai jo tera ghamza-e-khun-rez hai saqi

kharabaat-e-do-alam ka mujhe mastana kahte hain
mera dil baada-e-anwar se labrez hai saqi

tera 'zaiq' na kyon nazan ho iqbaal par apne
sawad-e-hind jis se sani-e-tabrez hai saqi