nigah-e-naz ka khali gaya na tir koi
kisi ki jaan gai aur hua asir koi

visal-e-yar ka rasta dikha rahi ho jo
hamare hath mein dikhti nahin lakir koi

na bhul kar bhi karo in hasin buton ka yaqin
na in buton ka khuda hai na in ka pir koi

kabhi kabhi mujhe sab se amir lagta hai
gali ke mod pe baitha hua faqir koi

kahan talak yun akele safar karoge 'sada'
tumhaare sath na rahbar na rahgir koi