pahadon se rah-e-safar par akele
nikalte hain dariya sarasar akele

guzarti hai kya kya aziyyat kisi par
koi chal ke dekhe ghadi bhar akele

ho kitna bhi mushkil safar par ye dariya
to chalta hi rahta hai hans kar akele

mile un se aakar na dariya agar to
bharenge kabhi kya samundar akele

jo karte hain chinta sabhi ki khushi ki
wo rahte hain duniya mein aksar akele

ye duniya bhala ras aai kab un ko
sada se rahe hain payambar akele

sikhata hai suraj ye hum ko ki kaise
kare koi jag ko munawwar akele

na sangi na sathi na rupya na paisa
gaya is jahan se sikandar akele

unhen yaad rakhti hai duniya ye 'madhuman'
jo lete hain duniya se takkar akele