pahle har lafz toliye sahab
phir zaban apni kholiye sahab

kuchh to hamraaz ka bharam rakhiye
band mutthi na kholiye sahab

shakhsiyat ka lihaz to rakhiye
narm lahje se boliye sahab

mere saghar mein aks-e-jalwa hai
dekh kar zahr gholiye sahab

kho na jae kahin waqar apna
be-zarurat na boliye sahab

band kije zaban chup rahiye
aur aage na boliye sahab

jo 'ziya' ko charagh-pa kar de
wo sahifa na kholiye sahib