pesh wo har pal hai sahab
phir bhi ojhal hai sahab

aadhi-adhuri duniya mein
kaun mukammal hai sahab

aaj to pal pal marna hai
jina to kal hai sahab

achchhi-khasi wahshat hai
aur musalsal hai sahab

dur talak tapta sahra
aur ek chhagal hai sahab

pure chand ki aadhi raat
raqsan jangal hai sahab

jhil kinare tanhai
aur ek pagal hai sahab

apna aap muqabil hai
jiwan danggal hai sahab

har khwahish ka qatl hua
dil kya maqtal hai sahab

dil ka bojh kiya halka
aankh ab bojhal hai sahab

ab wo khidki band hui
dar bhi muqaffal hai sahab