raat tarik raste khamosh
manzilon tak hain qumqume khamosh

aarzuon ke dhe gae ahram
hasraton ke hain maqbare khamosh

dil ke ujde nagar se guzre hain
kitni yaadon ke qafile khamosh

muntazir the jo meri aamad ke
hain munderon pe wo diye khamosh

mere mustaqbil-e-mohabbat par
zindagi ke hain tajribe khamosh

zehn-e-azar hai khwab-gah-e-jumud
fikr-o-fan ke hain but-kade khamosh