rah-e-pur-pech mein guzra wo safar yaad aaya
ashk palkon se gire khun-e-jigar yaad aaya

jis ko nazron mein basae hue hum rahte the
hamein rah rah ke wo be-mehr nazar yaad aaya

hum ne har rah mein dhunda use har sans ke sath
wo har ek mod pe har sham-o-sahar yaad aaya

ek saya sa raha sath mere sae ke
lamha lamha hamein wo chaar pahar yaad aaya

jis ko bhule se kabhi bhul na pae the kahin
hamein har bazm mein wo chashm-ba-sar yaad aaya

wahi andaz-e-takallum wahi nazron mein tazad
wo mera arz-e-tamanna ka asar yaad aaya

bahr-e-tufan-e-hawadis mein ghire the aise
lab-e-sahil bhi wahi madd-o-jazar yaad aaya