raushni se haar kar
tirgi se pyar kar

hath hathon se mila
pith pichhe war kar

ziddi bachcha so gaya
apni khwahish mar kar

soch ka chashma laga
der tak didar kar

kis ne bola dard le
kis ne bola pyar kar

zahr pi aur ho amar
dub ja aur par kar

ishq ki bazi laga
jit ja sab haar kar

khamushi ka qufl tod
lab hila izhaar kar

jurm-e-ulfat man le
muskura iqrar kar

shairi ka shauq hai
shairon se pyar kar