sach hai hoga duniya mein koi hum sa kam tanha
ham-nafas nafas tanha ham-qadam qadam tanha

dahr aaina-khana aur us mein hum tanha
dekhiye to ek mahfil waise ek-dam tanha

aarzu rifaqat ki aadmi ki fitrat hai
zindagi nahin katti aap hon ki hum tanha

zindagi ki rahon mein sath chhodne walo
kash dekh lete tum chal ke do-qadam tanha

sirf ye batana hai shewa-e-wafa kya hai
warna kaun sahta hai itne ranj-o-gham tanha