sahar ke khwab ka mujh par asar kuchh der rahne do
kisi ke haal ki mujh ko khabar kuchh der rahne do

jude hain in se nadida purane baam-o-darwaze
nae shahron mein ye viran ghar kuchh der rahne do

kahin guzre hue ayyam phir wapas na aa jaen
dil-e-be-khauf mein is ka khatar kuchh der rahne do

'munir' is aalam-e-raushan mein rahna aur khush rahna
abhi us din se aage ka safar kuchh der rahne do