sahra mein ghata ka muntazir hun
phir us ki wafa ka muntazir hun

ek bar na jis ne mud ke dekha
us jaan-e-saba ka muntazir hun

baitha hun durun-e-khana-e-gham
sailab-e-bala ka muntazir hun

jaan-e-ab-e-baqa khoj mein hai
main mauj-e-fana ka muntazir hun

khil jaunga apne aap se main
tahsin-e-saba ka muntazir hun

is daur mein khwahish-e-tarab hai
madfan mein hawa ka muntazir hun

mazi ki saza bhugat raha hun
farda ki saza ka muntazir hun

shayad ki wahan mafar ho gham se
taskhir-e-khala ka muntazir hun

hathon mein hai mere daman-e-shab
suraj ki sada ka muntazir hun

barson se khada hun hath uthae
tasir-e-dua ka muntazir hun

mera to khuda kabhi nahin tha
main kis ke khuda ka muntazir hun

kahte hain jise 'nazar' musafir
us aabla-pa ka muntazir hun