shajar ki shakh se jhula utar bhi sakta hai
tere baghair ye sawan guzar bhi sakta hai

samet rakkha hai apna wajud khud main ne
ye aaina jo gira to bikhar bhi sakta hai

kabhi kabhi hamein milne ka izn de kar wo
hamari zat pe ehsan kar bhi sakta hai

tamasha yun na dikha apni be-niyazi ka
hamare sabr ka paimana bhar bhi sakta hai

wo jis ko dawa hai tufan ka rukh badal dega
kabhi kabhi kisi aandhi se dar bhi sakta hai

kaha tha us ne ki milne zarur aaega
magar wo wade se apne mukar bhi sakta hai

bade saliqe se sab ko sambhaal rakkha hai
zara si chuk se kumba bikhar bhi sakta hai

duaen mangti rahti hun roz-o-shab rab se
agar wo chahe muqaddar sanwar bhi sakta hai