shayad aaghaz hua phir kisi afsane ka
hukm aadam ko hai jannat se nikal jaane ka

un se kuchh kah to raha hun magar allah kare
wo bhi mafhum na samjhen mere afsane ka

dekhna dekhna ye hazrat-e-waiz hi na hon
rasta puchh raha hai koi mai-khane ka

be-talluq tere aage se guzar jata hai
ye bhi ek husn-e-talab hai tere diwane ka

hashr tak garmi-e-hangama-e-hasti hai 'shakil'
silsila khatm na hoga mere afsane ka