sikhaya ishq ne mujh ko ki jang-ju kya hai
ye kya hai zakhm ki shiddat ki phir rafu kya hai

agar sukun hai kisi ek jagah thahar jaana
to phir ye khub se bartar ki justuju kya hai

usul hote hain kuchh dosto mohabbat ke
agar namaz hai sab kuchh to phir wuzu kya hai

agar ho chhod gae mujh ko chhodne wale
to teri yaadon sa ye mere ru-ba-ru kya hai

sitare todna mumkin hai ya nahin mumkin
tum us ko chhodo batao ki aarzu kya hai

mere hain samne mere mere baghair tere
agar hain yar ye mere to phir adu kya hai

tumhaari mahfilon mein aana phir chale jaana
agar zawal hai ye bhi to surkh-ru kya hai