sochta hun yahan kis se hai shanasai meri
wahi viran sa makan hai wahi tanhai meri

jis ki zulfon mein lagaya hai mohabbat ka gulab
kaghzi phulon se karta hai pazirai meri

is dariche mein nahin dekhne wala koi
wo tamasha hun ki hai khalq tamashai meri

band-e-gham tut ke ashaar mein bah nikla hai
qarye qarye mein hui jati hai ruswai meri

dil ke fanus mein jal uthti hain shamen 'fakhir'
dard aata hai jo karne ki pazirai meri