surat-e-dilkashi rahi khwahish-e-zindagi rahi
dagh-e-dil-e-kharab se raat mein raushni rahi

tere sabhi kulah-posh koh-e-ghurur se gire
apni to tark-e-sar ke baad ishq mein bartari rahi

satwen aasman tak shoala-e-ilm-o-aql tha
phir bhi zamin-e-ahl-e-dil kaisi hari bhari rahi

aap hua hai mundamil gul ne bahaar ki nahin
shohrat-e-dast-e-chaaragar zakhm hi dhundhti rahi

kahte hain har adab mein hai ek sada-e-bazgasht
'mir' ke husn-e-sher se meri ghazal saji rahi