tamasha-e-alam hai aur main hun
khushi ke sath gham hai aur main hun

zamane ka sitam hai aur main hun
ye sab un ka karam hai aur main hun

rah-e-haq par qadam hai aur main hun
sar-e-aflak kham hai aur main hun

tamawwuj par abhi hai bahr-e-hasti
safina zer-o-bam hai aur main hun

abhi kaise kahun subh-e-bahaaran
abhi to sham-e-gham hai aur main hun

kahin bazm-e-nashat-e-aish-o-ishrat
kahin par chashm-e-nam hai aur main hun

badal dalun nizam-e-zindagi ye
badi mushkil mein dam hai aur main hun

kisi lamha bhadak kar bujh na jae
charagh-e-subh-dam hai aur main hun

mujhe tanha na samjho mere 'hamdam'
hujum-e-ranj-o-gham hai aur main hun