tere dayar mein koi gham-ashna to nahin
magar wahan ke siwa aur rasta to nahin

simat ke aa gai duniya qarib-e-mai-khana
koi batao yahi khana-e-khuda to nahin

labon par aaj tabassum ki mauj machli hai
koi mujhe kisi goshe se dekhta to nahin

bana len rah isi khar-zar se ho kar
junun-e-shauq ka ye faisla bura to nahin

sabab ho kuchh bhi tere infial ka lekin
meri shikast se pahle kabhi hua to nahin

na reg-e-garm na kante na rahzan na ghanim
ye rasta kahin ghairon ka rasta to nahin

dayar-e-sajda mein taqlid ka riwaj bhi hai
jahan jhuki hai jabin un ka naqsh-e-pa to nahin

khayal-e-sahil o fikr-e-tabah-kari-e-mauj
ye sab hai phir bhi tamanna-e-nakhuda to nahin