tere har ek sitam ka hisab utrega
khuda ka tujh pe sitamgar azab utrega

bahut ghurur hai tujh ko abhi jawani par
kabhi to tera ye rang-o-shabab utrega

sitam hadon se badhega to aasman se koi
sitamgaron ko wo dene jawab utrega

haqir mujh ko samajhta hai tu are nadan
main than lun to abhi aaftab utrega

badhega zulm hadon se jab is zamane mein
yaqin mano koi inqalab utrega

lagegi aag chaman mein 'qamar' to hoga dukh
dhuan uthega to aankhon mein aab utrega