tere hirman-nasibon ki bhi kya taqdir hai saqi ba-har-surat wahi zindan wahi zanjir hai saqi sharare zindagi ke dekhta hun rakh mein pinhan mere haq mein ye khak-e-ashiyan iksir hai saqi bahaar aai hai gulshan mein magar mahsus hota hai nazare sahme sahme hain faza dil-gir hai saqi khush aaegi bhala kaise wo tere mai-paraston ko jo khamoshi harif-e-nala-e-shab-gir hai saqi wo aazadi qafas mein git jis ke gae jate the gulistan mein wahi ab panw ki zanjir hai saqi bahaar aai qafas ke dar khule baadal uthe barse dua lekin hamari tishna-e-tasir hai saqi faqat ek jurm-e-haq-goi ke chalte teri mahfil mein tere 'asif' ki masti mojib-e-tazir hai saqi