teri mahfil se jo uth jaenge mehr-o-wafa wale
to puchhega tujhe phir kaun ai jaur-o-jafa wale

nigah-e-yar itni si inayat hum pe ho jati
ki duniya ye samajh leti ki hum bhi hain khuda wale

hamari qadar kar pir-e-mughan ki waste jin ke
liye phirte hain jam-e-arghawani mai-kada wale

ye beda hai junun ka kab ruka baad-e-mukhalif se
naya tufan laen dhund dhundh kar bala wale

diye jalte na palkon par na bazm-e-arzu sajti
bada ehsan dil par hai tera jud-o-sakha wale

tujhe apnon ne chhoda aur ghairon ne hai apnaya
mubarak ho tujhe naql-e-makani mustafa wale

ghazal kahte na tujh par to bhala kis ko pata chalta
ye chehra chaudhwin ka chand hai gesu ghata wale

takhallus hai 'sahar' dil ki gali shahr-e-mohabbat hai
chale aao bahut aasan se hain hum pata wale