tira-bakhton ko kare hai nala-e-ghamgin kharab
jis tarah ho ja saba se kakul-e-mushkin kharab

jon nasim-e-subh ghunche gul ke sab barbaad de
sard-mehri se buton ki hain dil-e-rangin kharab

be-dimaghi mat kar ai zalim ki jun mauj aur habab
dil mera kar de hai pal mein abru-e-pur-chin kharab

jun jale hai shama ka musht-e-zar aur tasbih-e-ashk
jis tarah sarkash ka hai duniya kharab aur din kharab

tha bana 'uzlat' wo jab faulad-dil parwez se
tab to teshe ne kiya yun khana-e-shirin kharab