tum ahl-e-dil ho so dil mein rakha hamara nam
wagarna hum bhi hain kya aur kya hamara nam

har ek shakhs ke sine mein hum dhadakte hain
sabhi ke honton pe hai ja-ba-ja hamara nam

tamam umr kai lafz chaak par ghume
tab ek arse mein ja kar bana hamara nam

tumhaare kanon ki dhalti hui guphaon mein
ba-rang-e-raushni padta hua hamara nam

sada kuchh aur hi aai thi us ki jaanib se
hamein laga tha ki us ne liya hamara nam

khamoshiyon ke badan par sadaen likhni thin
ajib shakhs tha likhne laga hamara nam

phir us ko sun ke bahut der tak sabhi roe
koi kahani thi aakhir mein tha hamara nam