tumhaare honton se bujhne ko jalna padta hai
tumhaari aarzu ho to machalna padta hai

ba-jism mil nahin sakta so khushbu banta hai wo
mere liye use paikar badalna padta hai

hamin bujhate hain lau pahle sab charaghon ki
phir in charaghon ke hisse ka jalna padta hai

phir intizar bhi to karna hota hai tera
mujhe to waqt se pahle nikalna padta hai

badi hai sakht meri jaan teri udasi bhi
ba-shakl-o-surat-e-diwar dhalna padta hai

main haar jata hun un do udas aankhon se
mujhe safar ka irada badalna padta hai