tumhaare zulm ki miad ghat bhi sakti hai
ye mere panw ki zanjir kat bhi sakti hai

jo sach kaha hai to is ki saza bhi jaanta hun
mujhe khabar hai zaban meri kat bhi sakti hai

dilon ke beach jo duri hai us ko khatm karen
ye sarhadon ki rukawat to hat bhi sakti hai

mujhe shikast nazar aa rahi hai khud apni
magar yaqin hai bazi palat bhi sakti hai

meri nazar ko na aamada-e-nazara kar
meri nazar tere rukh se lipat bhi sakti hai