tumhaari yaad se dil-bastagi si hoti jati hai hamari zindagi ab zindagi si hoti jati hai tumhaare ru-e-anwar ke tasawwur hi ke sadqe mein dil-e-gham-gin mein paida raushni si hoti jati hai dhadakta hai dil-e-mahjur har-dam yaad mein us ki haram ke shauq mein waraftagi si hoti jati hai faza-e-mast-e-taiba imbisat-e-dil ka bais hai wahan har ek pe tari sarkhushi si hoti jati hai mubarak 'tahniyat' yaad-e-madina mein ye betabi isi taqrib mein ye shairi si hoti jati hai