tuti hui qabron mein kahin the ki nahin the sab ahl-e-hawas zer-e-zamin the ki nahin the dibacha-e-imkan mein rakh chhodne wale hum log bata ahl-e-yaqin the ki nahin the dukh odh ke rone ke adakar mere yar tum meri mohabbat ke amin the ki nahin the jo khwab tasalsul se mujhe noch rahe hain wo khwab tere dil ke makin the ki nahin the ai tair-e-lahut gham-e-khak-basar par hangame sar-e-arsh-e-barin the ki nahin the us budhi pujaran ke khad-o-khal se puchho but us ki tamanna ke hasin the ki nahin the