viran hai tamannaon ka manzar tere hote
kya haal hai dil ka mere dilbar tere hote

ek chashm-e-karam shahr-e-ghariban pe idhar bhi
pyasa hai nagar ek samundar tere hote

kuchh tujh ko khabar hai mere dam-saz masiha
phirta hun rah-e-zist mein dar dar tere hote

kya tujh ko gawara hai tera banda-e-majbur
aghyar ki chaukhat pe rakhe sar tere hote

ai gardish-e-mina-e-shab-o-roz bata kuchh
kyon shahr mein hain itne gadagar tere hote

ek ye bhi hai andaz tere husn-e-karam ka
hun rah ke watan mein bhi musafir tere hote

hai kunj-e-qafas mein ye tera haal gham-e-dil
kya hashr uthata jo kabhi par tere hote

qatil bhi hai tu aur masiha bhi mera tu
kya rang karun dil ka fusun-gar tere hote

ek marhala-e-marg abhi aur hai baqi
ye kaam bhi ho jae sitamgar tere hote

ai 'shaikh' tere fikr ki ye shoala-bayani
manind-e-guhar-ha-e-sukhnawar tere hote