wo dost hai aur bura nahin hai
bas mere mizaj ka nahin hai

dil mera bhi kab tha aisa sada
wo aankh bhi be-khata nahin hai

us shakhs ne pher li hon aankhen
aisa to kabhi hua nahin hai

ek bar mohabbaton ka baadal
barsa hai to phir ruka nahin hai

ye jaan se guzarti saaten hain
ye dard ka marhala nahin hai

kuchh zakhm wahan lage hain lekin
wo shahr to bewafa nahin hai

jo meri talash mein hai ab tak
main hun koi dusra nahin hai

is ahd ki hai ye ek zarurat
hijrat koi saneha nahin hai