ye bar-e-gham bhi uthaya nahin bahut din se ki us ne hum ko rulaya nahin bahut din se chalo ki khak udaen chalo sharab piyen kisi ka hijr manaya nahin bahut din se ye kaifiyat hai meri jaan ab tujhe kho kar ki hum ne khud ko bhi paya nahin bahut din se har ek shakhs yahan mahw-e-khwab lagta hai kisi ne hum ko jagaya nahin bahut din se ye khauf hai ki ragon mein lahu na jam jae tumhein gale se lagaya nahin bahut din se