ye mujh mein jo be-intiha tanhai hai
is dasht ki aab-o-hawa tanhai hai

main dard ke naghme sunaunga tumhein
tum jaan lena muddaa tanhai hai

mujh tak pahunchne ko hai ek rah-e-amal
aur jaan lo wo rasta tanhai hai

jo bhid mein chehre kahin gum ho gae
un se mera ab rabta tanhai hai

main us maqam-e-zat tak laya gaya
har ibtida har intiha tanhai hai

jis ko yahan par kaamyabi mil gai
us ki saza tanhai ya tanhai hai