zindagi hai ajal to tu bhi nahin
sochta hun atal to tu bhi nahin

tere hote bhi sab kharab hi tha
aur phir aaj-kal to tu bhi nahin

ai shagufon mein rang bharte shakhs
is udasi ka hal to tu bhi nahin

jo teri justuju mein chhod diya
us ka nemul-badal to tu bhi nahin

mujh ko ye jaan kar udasi hui
kuchh masail ka hal to tu bhi nahin

main bhi 'zoraiz' koi zamzam hun
aur phir ganga-jal to tu bhi nahin