mere ghar ko aati bal khati pagdandi kinare
kai rang ke phul khile hue hain

main aate jate
jin se ham-kalam hoti hun

ki aaj ke mashini daur mein
wo mere aafaqi dakiye hain

jin ki khushbu mein mere khwabon ki tabir pinhan hai
jin ke rangon mein mere kunwar mere kanhaiya ke hone ka nishan nihan hai

main har roz jin ke daman mein apni taqdir ki shatranj bichhati hun
un ke mukh pe khile rang ko sidq-e-dil se

waqt ka ugla mohra gardanti hun
mere phul mere dakiye

jo kabhi jamuni rang odh kar
aamad-e-bahaar ka mitha git bante hain

jo kabhi nile rang mein gunguna kar
dur dishaon mein riste malal ki sada bante hain

jo kabhi safed rang mein hans kar
meri be-sud mohabbaton ka madfan bante hain

mujhe un phulon ki zaban ka ilm hai
main rangon se achchhe se waqif hun

ki main wo zamin-zadi hun
jis ki bhuri aankhon mein sitaron ki raushni

mitti ke pardon se dhaki padi hai