banaya hai musawwir ne hasin shahkar aurat ko
alag pahchan deta hai kahani-kar aurat ko

wo man ho bahan biwi ya ki beti ho suno logo
har ek kirdar mein rakkha gaya gham-khwar aurat ko

yahi sach-much bana degi tere ghar ko hasin jannat
zara tum pyar se karna kabhi sarshaar aurat ko

phir ek din un ki qismat mein likhi jati hai ruswai
zamane mein samajhte hain jo karobar aurat ko

usi ka rup dhaare phir rahi hain kuchh chudelen bhi
main aurat hi nahin kahta kisi makkar aurat ko

salam un auraton par jo ki maen hain shahidon ki
salami pesh karta hun main sau sau bar aurat ko

mujhe us waqt 'arshad' kyon meri man yaad aati hai
kisi kutiya mein dekhun jab kisi lachaar aurat ko