dehati raston pe chalti shahron ki sadkon pe tahalti sar par chikne chikne ghade hain hath mein moti kangan jade hain us ke pichhe bachche hi bachche chhote chhote panw badhate us ke jaane par rote hain man ghar aati khush hote hain hai wo bhaarat-mata apni sab se pyari sab se achchhi sach-much ki ye man hai apni jaan fida kar dene wali sachcha pyar dikhane wali khun aur dudh pilane wali is ki hatheli kaisi ghisi hai jaise wo fikron mein pisi hai kheti armanon ki hari hai bachchon se is ki god bhari hai bhaarat man hai bhaarat man hai bhaarat man hai bhaarat man hai