chanda-mama tum ko mama
nahin kahunga nahin kahunga

mange ka ujyala tum mein
bin mange sab kala tum mein

banjar dharti banjar kheti
mausam kab hariyala tum mein

main achchhi dharti ka malik chanda-mama
tum ko mama nahin kahunga nahin kahunga

baadal se ghabraate ho tum
dar dar kar chhup jate ho tum

tum se kya ummiden rakhna
kab jao kab aate ho tum

main hun ek bahadur bachcha chanda-mama
tum ko mama nahin kahunga nahin kahunga

charkhe wali budhiya nani
charkhe le kar kahan gai hai

aaj tumhaari shan purani
sab jhuti thi nahin rahi hai

kyun tum jhuti shan dikhate chanda-mama
tum ko mama nahin kahunga nahin kahunga