meri khwahish hai har mahine mein
raat ek is tarah ki ho jis mein

shahr ki sari battiyan ek sath
ek ghante ko chup kara di jaen

shahr ke log chhat pe bheje jaen
un ki taron se jab nazar uljhe

tab andhere ka husn un pe khule
kahkashan tut kar gire sab pe

sab ki aankhon ke zakhm bhar jaen
mujh ko gar intikhab karna ho

main amawas ki raat ko chun lun
chand ki ghair haziri mein ye baat

saf shayad ziyaada ho hum pe
apna nuqsan kar liya hai bahut

hum ne ijad raushni kar ke