suluk-e-narawa-e-dar-e-fani dekhte jao
hamara haal bhi ai aan-jahani dekhte jao

na jaane tum kahan ja kar achanak ho gae pinhan
padi hum par jo aafat na-gahani dekhte jao

bapa hai har taraf matam siyah-poshi hai har jaanib
zamana kar raha hai nauha-khwani dekhte jao

suhagan tha tere dam se ye hindustan ai bapu
hui barbaad ab is ki jawani dekhte jao

kabhi dalo nazar hindostan ke bakht-e-khufta par
zara nakaamiyon ki kaamrani dekhte jao

bahaaren lut gain sari ki sari wae-nakaami
khizan ki har taraf hai hukmrani dekhte jao

umidon ka shajar murjha gaya hum hind walon ki
nihaal-e-arzu ki ye nishani dekhte jao

jahan josh-e-nashat-o-aish ki har-su hukumat thi
wahan yas-o-alam ki hukmrani dekhte jao

chaman mein har taraf thi justuju gul ki anadil ko
faqat sayyaad ko thi bad-gumani dekhte jao

tumhein to dar-haqiqat chain hasil ho gaya lekin
hamare bahr-e-gham ki be-karani dekhte jao

kahin koi nazar aata nahin kis se kahe 'shahid'
khudara haalat-e-dard-e-nihani dekhte jao