sakht hairat hai ye kis bazm mein baitha hun main
ahl-e-mahfil ko bade ghaur se takta hun main

ek surat nazar aati nahin dekhi-bhaali
kaun se log hain ye jin mein ki tanha hun main

bekasi par meri roti hai meri tanhai
sifat-e-shama jab is bazm mein jalta hun main

ham-zaban hai na koi aur na koi hamraaz
dastan apni hawaon ko sunata hun main

phenk deta hun fazaon mein nawaen dil ki
apna dam-saz kisi ko nahin pata hun main

aah duniya teri wusat mein ye kya hai ki koi
na to mera hai shanasa na kisi ka hun main

koi dil-soz nahin dahr mein is dil ke siwa
aur is dil se bhi kam-bakht bhadakta hun main

kuchh ajab haal hai aashufta-mizaji ka meri
kabhi ro deta hun main to kabhi hansta hun main

ruh ghutti hai jo is tang qafas mein meri
sifat-e-murgh-e-giraftar phadakta hun main

barq ki lahr si hai har rag-o-pai mein sari
hama-tan nabz ki manind tadapta hun main

dil dhadakta hai to kanon mein ye aati hai sada
rahm ai shiddat-e-ehsas ki phatta hun main

kabhi taskin ke liye hai gul-o-gulshan ki talash
kabhi wahshat mein su-e-dasht lapakta hun main

koi dekhe meri us waqt ki shorida-sari
dar-o-diwar se jab sar ko patakta hun main

dil-e-hassas bhi kya chiz hai allah allah
jab kali koi chatakti hai dahalta hun main

sans leta hun to andar se nikalta hai dhuan
kaun si aag hai ye jis mein ki jalta hun main

rakh kar di tapish-e-ishq ne sari hasti
ek shoala ki tarah phir bhi lapakta hun main

kisi karwat kisi pahlu nahin aaram mujhe
kaun sa dard hai ye jis se tadapta hun main

chain aata nahin ek dam bhi jo is dil ko 'jalil'
kis ko is pap ki basti mein bhatakta hun main